फाऊंडेशनबद्दल
लोककल्याणकारी राजे राजर्षी शाहू महाराजांचा वारसा जपत स्व. राजे विक्रमसिंह घाटगे यांनी आपले संपूर्ण जीवन कागल, गडहिंग्लज व उत्तूरवासियांसाठी समर्पित केले. आपल्या प्रत्येक सहकारी संस्थेला शाहू महाराजांचे नाव देऊन त्यांनी नवा आदर्श जपला. राजे विक्रमसिंह घाटगे यांचे कार्य पुढे नेण्याच्या हेतूने लोकहिताची कामे करणे व त्यातून समाजहित जपणे हा एकमेव उद्देश घेऊन ९ ऑगस्ट २०१७ रोजी राजे विक्रमसिंह घाटगे फाऊंडेशनची स्थापना करण्यात आली. तेव्हापासून हे फाऊंडेशन सामाजिक, शैक्षणिक, आरोग्य, शेती व वैद्यकीय क्षेत्रात भरीव कार्य करत आहे.
पाणी व आरोग्य या मानवी जीवनातील मूलभूत गरजा आहेत. प्रत्येक गावात पिण्यासाठी व शेतीसाठी पुरेसे पाणी उपलब्ध व्हावे या हेतूने फाऊंडेशनतर्फे जलयुक्त शिवार व जलसंधारणाच्या अन्य योजना राबविल्या जात आहेत. निरोगी व सशक्त समाज हा विकासाचा पाया आहे. यासाठी सर्व समाजघटकांचे आरोग्य जपणे अत्यंत महत्वाचे आहे. याच विचाराने विविध आरोग्य शिबिरे, रक्तदान शिबिरे, आरोग्य केंद्रे चालविली जात आहेत.
विविध समाज घटकांशी समरस होऊन त्यांच्या गरजा समजून घेत त्यांच्या समस्यांचे निराकरण करण्याचे काम फाऊंडेशनद्वारे केले जाते. विद्यार्थ्यांना शालेय साहित्याचे वाटप, गृहिणींना सिलेंडर वाटप, शेतकरी बांधवांना अवजारांचे वाटप, हाय वे वरील सुरक्षेसाठी ऊस वाहतूक करणाऱ्या गाडयांना रिफ्लेक्टर लावण्याचे काम या व यासारख्या अनेक कामांची यशस्वी परिपूर्ती फाऊंडेशनच्या माध्यमातून नियमितपणे होत आहे.
